Tuesday, 9 July 2013

එරිකෝ හන්ටර් - The Flying man 7 ( End )




රාත්‍රී ආහාරයට කාමරය තුලම රැදුන එරිකෝත් සිම්රනුත් විලියම්ස් පවුලේ අභිරහස ගැන බොහෝ දුරට කතා කරන්නට විය.. තවමත් තේරුම් ගන්නට නොහැකිව ඉතිරිව තිබූ බොහෝමයක් දේවල් ගැන එරිකෝගේ හිතේ රැදුන අසතුට හොදින්ම තේරුම් ගන්නට සිම්රන්ට එතරම්ම අපහසුවක් නොවීය..  මැදියමත් පසු වන තුරාම බොහෝමයක් දේවල් ගැන කතා කරමින් උන් ඔවුන්ට නින්දට යාමට වුවමනාවක් නොතිබුනේ හිත නොසංසුන් කරමින් තිබූ අභිරහස නිසාවෙන්ය..

" සිම්රන් එරික් කියපු දේවල් විශ්වාස කරනවද?"

" විශ්වාසයිම කියන්නත් බෑ එරිකෝ.. ඒත් එරික් කියපු සමහර දේවල් වැරදී කියලා ඔප්පු කරන්න පුළුවන් කමක් අපි ලගත් නැහැනේ.. කොටින්ම එරික් එදා අයර්ලන්තයේ හිටියා කියන එක ඔයා වුනත් කලින්ම කියපු දෙයක්නේ.. ඒ හන්දා මට හිතෙන්නේ එරික් කියන්නේ ඇත්ත කියලා.."

" ඒත් සිම්රන් එරික් මේ දේවල් කරපු කෙනා ගැන දන්නවා වෙන්න බැරිද? පුංචිම හරි දේකින් එරික් ඒ කෙනාව උදවුකලා වෙන්න බැරිද? ඒ දේවල් බැරි වෙලාවත් එලියට ඒවි කියන සැකේ නිසා එරික් මේ විදිහට අපිත් එක්ක ඇවිත් කතා කලා වෙන්න බැරිද?"

ඇද මත හාන්සි වී හිදිමින් එරිකෝගේ කතාවට ඇහුම්කන් දෙමින් උන් ඈ ඉන් නැගිටුනේ ඇය කිසිවිටකත් එවැනි තර්කයක් ඔහුගෙන් බලාපොරොත්තු නොවූ නිසාවෙන්ය..

" එරිකෝ මේ ප්‍රශ්ණය ගැන කොයි විදිහට හිතනවද කියන එක මට තේරුම් ගන්න බෑ.. ඒත් ඇත්තටම මට එරික් ගැන එහෙම දෙයක් හිතා ගන්න බෑ.."

" හ්ම්ම්.. මට එහෙම හිතෙනවා සිම්රන්..  කෙනෙක් හුඟාක් ව්වෘත වෙන්නේ තමන් නිවැරදී කියලා ඕනවට වඩා ඔප්පු කරලා පෙන්නන්න ඕන උනාම කියලා මට හිතෙනවා.. එහෙනම් ඇයි එරික් එයා නිවැරදී කියලා මේ තරම්ම ඔප්පු කරලා පෙන්නන්න හදන්නේ? සමහරවිට මගේ මේ තර්කය සම්පූර්ණයෙන්ම වැරදි වෙන්න පුළුවන්.. ඒත් මට මගේ ඒ අදහසත් බැහැර කරන්න අමාරුයි.."

" මට නම් එහෙම හිතෙන්නේ නෑ එරිකෝ.. මම ගොඩ නගන්න උත්සාහ කරන විසදුම අතරේ මට එහෙම දෙයක් හිතා ගන්න අමාරුයි.. අනික එරික් නිවැරදී කියලා ඔප්පු කරන්න සංදර්ශණය වගේම වික්ටෝරියාත් හොද සාක්ෂියක්.. හැබැයි කවුරු නමුත් එරික්ගේ දැනුම මේ අපරාධ වලට පාවිච්චි කරා කියන එකනම් මට හොදටම විශ්වාසයි.."

" ඔවු සිම්රන් ඒක ඇත්ත.. මේ හැම මරණයකම අවසානයේ කිසිම සාක්ෂියක් ඉතිරි නොවුනේ අන්න ඒ හන්දා තමයි.. ප්‍රාන්ත පොලීසිය වුනත් සුළු සිද්ධියක් හේතු කර ගෙන මයිකල්ව අත් අඩංගුවට ගන්න පෙලඹුන එක සාදාරණයි කියලා මට හිතෙනවා.. මොකද ඒ අවස්ථාවේ තියෙන ප්‍රභලම සාක්ෂිය ඒක නිසා.."

"හොදයි එරිකෝ, අපි ඊළගට මොකද කරන්නේ?"

" අපි හෙට උදේට එරික් එක්ක කතාවුන විදිහටම අපේ කටයුතු කරමු.. මම හිතන විදිහ හරිනම් අපිට හෙට නියම අපරාධකාරයා හොයා ගන්න අමාරු වෙන එකක් නෑ සිම්රන්.."

" මේ පවුලේ කෙනෙක්ම එරික්ගේ දැනුම යොදාගෙන ඒ දේවල් ඉගෙන ගෙන මේ හැම මරණයක්ම කලානම් අපිට සැක කරන්න වෙන අය අතරට ආයෙම මයිකල්වත් ගන්න වෙනවා නේද? එහෙම බලද්දී හෙට ඔයා කරන්න යන දේ සම්පූර්ණයි කියලා හිතන්න බෑ නේද එරිකෝ?"

" සිම්රන්ගේ තර්කය හරි.. ඒත් මම මයිකල් ගැන තියෙන සැකය හිතින් අයින් කර ගන්න හේතු කීපයක්ම තියෙනවා.. සිම්රන් ඔහුව ආයෙම සැක කරන්න හේතුවක් කර ගන්නේ ඔහු එරික්ගෙන් හැම දෙයක්ම හොදින්ම ඉගෙන ගත්තු එකම කෙනා නිසා වුනාට දැනටමත් ලන්ඩන් වල හිර ගෙදර ඉන්න කෙනෙක්ටදේ අපි අද උදේ දැක්ක විදිහේ අඩි සළකුණක් තියලා යන එක කරන්න පුළුවන් දෙයක්ද?"

" ඔවු ඒකත් ඇත්ත එරිකෝ.."

" හෙට මේ හැම දෙයක්ම විසදන්න පුළුවන් කියලා මට විශ්වාසයි සිම්රන්.."

හිදගෙන හිදි දිගු පුටුවේම හාන්සි වෙමින් ඇස් පියා ගන්නට එරිකෝ සැරසුනේ නින්දක් ලගකවත් නොමැති බව හොදින්ම දැනගෙනය..

..............................

යාන්තමින් හිරු එළිය වැටී එත්ම වේලාසනින්ම අවදි වුන එරිකෝ සුපුරුදු පරිදිම අන්තර්ජාලයේ සැරිසරමින් එදිනෙදා සිදුවීම් ගැන තොරතුරු සොයන්නට වීය.. නමුත් වෙනදා මෙන්ම ඒ ගැන බොහෝ උනන්දුවක් ඔහුගේ සිතේ ඇති නොවුනේ එරික් තුලින් බලාපොරොත්තු තබා උන් අවසානය ඔහුගෙන් ලැබේවියි යන බලාපොරොත්තුව හිතේ රැදුනු නිසාවෙන්ය..  හෝරා දෙකක් පමණ විසදන්නට ආසන්නව තිබු අභිරහස ගැනත් අතරින් පතර අන්තර්ජාලය අතරත් රැදෙමින් තිබුන එරිකෝගේ හිත ඒ හැම හැම දෙයකින්ම මිදුනේ සිම්රන්ගේ කටහඬත් සමඟින්ය..

" ගුඩ් මෝර්නින්ග් එරිකෝ.. ඔයාටනම් මුළු රෑම නින්ද ගිහින් නෑ වගේ?"

" ඇත්තෙන්ම නැහැ සිම්රන්.. මේ ප්‍රශ්ණේ ඔළුවේ තියෙනකන් නිදහසේ නිදා ගන්න මට බැරි බව සිම්රන් දන්නවනේ.."

" එරික් අපිට වුවමනා දේ ඒ විදිහටම කරයි නේද?"

" ඇයි සිම්රන් එහෙම ඇහුවේ?"

" නැහැ.. අපි ඔහු ගැන සැකයක් ගොඩ නගන් එද්දීම ඔහුම ඇවිත් වුවමනාවටත් වැඩිය අපිට විවෘත වුන නිසා.."

" කියන්න බැහැ සිම්රන්.. අපි බලමු.."

ඔවුන්ගේ කතාවට භාදාවෙමින් කාමරයේ දොර අසලින් ජෝර්ජ්ගේ හඬ ඇසුනේ කලින් දා රාත්‍රීයේ කතා වූ පරිදිම වැඩ්මිලර් පවුලේ අය සමග ටික වේලාවක් ගත කරන්නට එරික් කාලය සූදානම් කර තිබූ හඟවමින්ය.. මද වේලාවක් සිම්රන් හා කතාකරමින් උන් ඔහු නික්ම යන තුරු එරිකෝ නිහඬවම බලාගෙන සිටියේය..

" තව ටිකකින් රිචර්ඩ්ගේ කාර්‍‍යාල කාමරයට එන්න කිවුවා.."

එරිකෝ කිසිවක් නොකියාම පරිඝණකය තුලම සිත යොමන්නට උත්සාහ කලත් දුහුල් රාත්‍රී ඇදුමින් සැරසී හිදි සිම්රන් ඔහුගේ සිත නොදැනිම ඈට නතුකර ගත්තාය..

වැඩි වේලාවක් නොගෙනම කාමරයෙන් පිටත් වුන ඔවුන් රිචර්ඩ්ගේ කාර්‍යාල කාමරයට එන විටත් වැඩ්මිලර් පවුලේ හැමෝම වාගේ එරික් සමග කතාබහේ යෙදෙමින් සිටියේය..

" එන්න මිස්ටර් එරිකෝ හැමදාම වගේ ඔබ එන්නේ කියපු වෙලාවට ටිකක් හරි පහු වෙලා.."

රිචර්ඩ්ගේ කතාව එරිකෝට නොරිස්සුම් බවක් ඇති කලත් ඒ බවක් නොපෙන්නන්නට උත්සාහ කල ඔහු, ඔහුට වුවමන හැම දෙයක්ම නිවැරදිව තිබේදැයි යන්න බැලීමට කාලය ගත කලේය.. තම සුපුරුදූ සුවපහසු අසුනේම හිදගෙන සිටි රිචර්ඩ් අසලම පවුලේ අනිත් අය සිටියදී කුඩා ගිණි උදුන අසලට වී හිදි එරික් ඔහුගේ අතෙහි වූ පොතකට අවදානය යොමා ගෙන සිටියේ එරිකෝ ආ බවක්වත් නොදැනෙන පරිද්දෙන්ය..

" ගුඩ් මෝර්නින්ග් එරික්, ඔබ සූදානමින් වගේ.."

" කොච්චර සූදානම් වුනත් හැම වෙලාවකම හිතේ කුතුහලයක් තියෙනවා එරිකෝ..  හිතේ පුංචිම හරි නොසංසුන් කමක් ඇති ලොකූ වැරැද්දක් වෙන්න.."

" අද එහෙම වෙන්න ඉඩක් නැහැනේ එරික්.. ඉන්නේ අපි විතරනේ.."

" කුතුහලයයි නොසංසුංකමයි ඇති වෙන්න ඉන්නෙ කවුද කියන එක වැදගත් නෑ එරිකෝ.. මට දැනෙන්නේ හැම මොහොතක්ම එක වගේ.."

" මිස්‍ටර් එරිකෝ, මට ඔබත් එක්ක ටිකක් කතා කරන්න ඕන.."

එරික් සමග තිබු කතාබහ අතර තුරේ ගිණි උදුන අසලට ආ ලොරේන් වැඩ්මිලර් වලවුවේ ගෙවුන දවස් කිහිපයේ පළමු වතාවට එරිකෝ සමඟ කතාකිරීමට පැමිණිම ඔහුගේ සිතට පුදුමයක් විය.. පවුලේ හැමෝගෙන්ම ඈත්ව කාමරයේ එක් කෙලවරකට වන්නට තිබුන ජනේලය අසළට ගිය ඈ එරිකෝ සමග කතාකලේ බොහෝම සිහින් හඬකින්ය..

" මිස්ටර් එරිකෝ, මම හොදින්ම දන්නවා මයිකල් නිවැරදී කියලා.. ඔබ සමහර විට දන්නවා වුනත් නැතත් මේ පවුලෙම අය එකතු වෙලා මයිකල්ව ඒකට අහු කරා.. ඒක මයිකල්ට වුනත් හොදින්ම තේරුණ දෙයක්.. ඒත් අපිට කරන්න පුළුවන් දෙයක් තිබුනේ නෑ.. එයාගේ නිහඬ බව හන්දා අන්තිමේ මේ වරදට නිකම්ම වැරදි කාරයා වුනේ මයිකල්.. ප්ලීස් මිස්ටර් එරිකෝ, මම හිතනවා ඔබට මයිකල් වෙනුවෙන් සාධාරනයක් කරන්න පුළුවන් කියලා.."

" මයිකල් නිවැරදී ලොරේන්.. ඒකේ සැකයක් නෑ.. ඒත් හරියටම කවුද මේ හැමදෙයක්ම කලේ කියන දේ හොයා ගන්න තව ටික කාලයක් ඕන.."

" මිස්ටර් එරිකෝ, ඇවිත් ඉදගන්න.. හැමදේම ලෑස්තියි.."

තවත් බොහො දේ කියන්නට හිතේ තිබෙන බව ලොරේන්ගේ මුහුණින් හොදින්ම පෙනෙන්නට වූවත් ඊට අවස්ථාවක් නොමැති වීම ගැන ලොරේන්ගේ මෙන්ම එරිකෝගේ හිතේද පසුතැවීමක් එක් කලත් අකමැත්තෙන් වුවද කතාබහට සමුදී වැඩ්මිලර් පවුලේ අය සමග එක් වුනේ එරිකෝට වුවමනා කර තිබූ අවසන් නිගමන කිහිපයට එලඹිමේ අරමුණිනි..

එරිකෝත් සිම්රනුත් වැඩ්මිලර් පවුලේ අයට පිටුපසින් තිබූ අසුන් වල හිද ගත්තේ ඔවුන් ගැන හොද අවදානයක් ලබා දීමට පහසු වෙන පරිද්දෙන්ය.. කාමරයේ දොර අසළින්ම  රැදී සිටි ජෝර්ජ් වැඩ්මිලර් පවුලේ අයගේ අවශ්‍යතාද සපුරමින් එරික්ගේ හැකියාවන් දෙස බලාගෙන සිටියේය.. වැඩ්මිලර් පවුලේ අය සමග රැදුනත් නිතරම එරිකෝ දෙස බලමින් වුන් ලොරේන් හට එරිකෝට පවසන්නට බොහෝ දේ ඇති බවක් ඇගේ මුහුණින් හොදින්ම පෙනෙන්නට තිබුනාය..

පවුලේ අය සමග ගෙවෙමින් තිබුන කාලය ලොරේන්ට හැරෙන්නට අනික් හැමෝගේම සිත් වලට සතුටක් ගෙන එමින් තිබුන බව හොදින්ම පෙනෙන්නට විය. එරික්ගෙන් ඉගෙන ගත් ඇතැම් දේවල් හොදින් ප්‍රගුණ කර තිබු රිචර්ඩ් හොද මැජික් ශිල්පියෙකුගේ හැකියාවන් එරික් තරමටම පෙන්වන්නට සමත් වීම එරිකෝගේ සැකය ඔහු වෙතට තවත් ඇද ගන්නට හේතුකාරණා විය.. සතුට අතරින් ගෙවී ගිය හෝරාවක පමණ කාලය අවසානයේ හිදගෙන වුන් අසුනෙන් නැගිටුන එරිකෝ එතෙක් වේලා ඔහුගේ රැදුන නිහැඬියාව බිද දමමින් තමන් බලාපොරොත්තු වූ අරමුණට ඉටුකර ගන්නට පළමු පියවර තැබීය..

" එරික්, අපිට ඔබේ පාවෙන හැකියාව ගැන රහසත් කියලා දෙන්න බැරිද?"

" ඒක හුඟක් සංකීර්ණ දෙයක් එරිකෝ.. මම හිතන්නේ නෑ ඒක එහෙම ලේසියෙන් කියලා දෙන්න පුළුවන් වෙයි කියලා.."

"එහෙම කියන්න එපා එරික්, ඔයා කලින් දවස් වල කියලා දීපු දේවල් වලින් ඔයාගේ නැණ්දම්මා නම් අපිටත් වැඩිය ඒක හොදටම ඉගෙන ගෙන.."

" එහෙමනම් මිසිස් ස්ටෙලාට පුළුවන්නේ අපිට ඒක කරලා පෙන්නන්න.."

" මේ රිචර්ඩ්ගේ බොරු මිස්ටර් එරිකෝ.. තවම මට එයා තරම්වත් හොදට උඩට එසවෙන්න බැහැ.."

" ඒ කියන්නේ ඔබලා දෙන්නාටම යම් තරමකට හරි ඒ දේ පුළුවන් කියන එක.. අනිත් දේවල් දැක්කා වගේම අපි ඒකත් බලමු නේද එරික්.."

එරිකෝගේ යෝජනාවට ස්ටෙලාගේත් රිචර්ඩ්ගේත් අකමැත්ත සතුට අතරින් වෙනස් වුන මුහුණු වලින් හොදින්ම පෙනෙන්නට වුවත් හැමෝගේම පෙරැත්ත නිසාම හිදගෙන සිටි අසුන් වලින් නැගිට ගිණි උදුන අසලට විත් එරික්ගේ සමිපයේ සිට ගත් ඔවුන් එරික්ගේ මඟ පෙන්වීම් අතරේ ඔහුත් සමඟම ඉහලට එසවෙන්නට උත්සාහ දැරීය..

පළපුරුද්ද නිසාම ඉක්මනින්ම පොලවෙන් මදක්  ඉහලට එසවුන එරික් බොහෝ වේලාවක් එලෙසම රැදී සිටියදී යම් තරමකින් වත් එසවෙන්නට නොහැකිවුන රිචර්ඩ් උත්සාහට අත්හැර දමද්දී ස්ටෙලා කෙමෙන් කෙමෙන් ඉහලට එසවුනේ පවුලේ හැමදෙනෙක්වම මවිතයටද පත් කරමිනි.. කිසිසේත්ම බලාපොරොත්තු නොවුන දෙය ගැන එරික් සතුටට පත් වෙද්දී එරිකෝගේ හිතේ මැවුනේ ඊට වෙනස්ම වූ හැඟීමක්ය..

" මිසිස් ස්ටෙලා, ඔබට කොච්චර කාලයක් ඉදන් මේ දේ කරන්න පුළුවන්ද?"

" ටික කාලයක් මිස්ටර් එරිකෝ.. ඒත් මට තාම එරික්ට වගේ හුඟක් වෙලා ඉහල රැදෙන්න අමාරුයි.."

" හ්ම්ම්, ඒ හන්දයි ඔබ ටික වෙලාවකින් පොළවේ අඩිය තියලා ආයෙම ගමන් කරන්න උත්සාහ කරන්නේ.."

" ඔවු මිස්ටර් එරිකෝ.. මම හිතන්නේ මට එරික් සංදර්ශණයේදි කරනවා වගේ එක දිගට ගොඩක් දුර ඒ විදිහට යන්නනම් තව ගොඩක් මහන්සි වෙන්න වේවි.."

" ඔය දන්න ටිකෙන්ම මිසිස් ස්ටෙලා හුඟාක් ප්‍රයෝජන අරන් තියෙන එකේ මම හිතන්නේ නෑ තව දුරටත් ඒ ගැන මහන්සි වෙන එකේ වැදගත් කමක් තියෙයි කියලා.."

කාමරයේ සිටි හැම කෙනෙක්ම එක වරෙම එරිකෝ දෙස බලා හිදියේ ඔහු කියූ දෙය තේරුම් ගන්නට නොහැකී වූ නිසාවෙන්ය.. කිසිවක් නොකියාම එරිකෝ දෙස කේන්තියෙන් මෙන් බලා හිදි ස්ටෙලා පිළිතුරක් දීමට බොහෝ වේලාවක් අර ගත්තාය..

" මිස්ටර් එරිකෝ මොකද්ද කියන්නේ කියන එක මට තේරෙන්නේ නෑ.."

" හරි අපි මෙහෙම කියමුකෝ.. විලියම්ස් පවුලේ මරණයන් එක්ක මිසිස් ස්ටෙලා මේ දැන කරලා පෙන්නපු දේ බැදිලා තියෙනවා කියලා.."

" මිස්ටර් එරිකෝ ඔබ හොද සිහියෙන්ද ඉන්නේ? දැන් නම් ඔබ ඔබේ සීමාව පන්නලා යන්නවා.."

බලාපොරොත්තු නොවූ වේලාවක එරිකෝ කියන්නට යන දෙයින් කෝප වුන රිචර්ඩ් එරිකෝට  කෑ ගසන්නට වුවත් ඔහු ඒ ගැන එතරම්ම උනන්දුවක් නොදැක්වීය..

" මිස්ටර් රිචර්ඩ්, මම කරන්නේ මගේ රාජකාරිය.. ඔබලා නිවැරදි නම් ඒක ඔබලාගේ පිලිතුරු වලින්ම ඔප්පු වේවි.. මම වැරදි නම් ඒ වෙනුවෙන් සමාව ඉල්ලන්න ඕන වෙලාවක සූදානම්.. ඒ හන්දා දැන් ඔබවත් වෙන කවුරුවත්ම මට බාදා කරන්න එපා.."

එරිකෝගේ ආවේගශීලී කතාබහ ඉදිරියේ කිසිවක් කියන්නට නොගිය රිචර්ඩ් වාඩි වී හිදි පුවටම බර වූයේ ඔහුගේ කතාවට ඇහුම් කන් දීමේ වුවමනාවක්වත් නැති අයුරින්ය.. කාමරය පුරාම ආයෙමත් තරමක නිහැඬියාවක් ඇති වෙද්දී ස්ටෙලා දෙසට හැරුන එරිකෝ ඇගෙන් පිළිතුරු බලාපොරොත්තු විය..

" එහෙමනම් මිස්ටර් එරිකෝ ඔබට මාව විතරක්ම නෙමෙයි නේ සැක කරන්න වෙන්නේ.. තව අයත් ඉන්නවනේ."

" ඔවු මිසිස් ස්ටෙලා තව අය ඉන්නවා.. ඉන්නවාටත් වැඩිය හිටියා කිවුවනම් නිවැරදියි.. මොකද ඒ අයට ඔබට වගේ මේ දේ කරන්න බෑ කියන එක ඔබ හොදටම දන්නවා මම හිතන්නේ.."

"  මේක් නම් විහිළුවක් මිස්ටර් එරිකෝ.. මම හිතන්නේ ඔබට උසාවියෙන් මේකට ලැබුන තීන්දුව පිළිගන්න අකමැති හන්දා ඔබ මේ වගේ කතා මවනවා කියලා.."

" නැහැ මිසිස් ස්ටෙලා ඔබයි මේ ප්‍රශ්ණය මග හරින්න උත්සාහ කරන්නේ.. එරික් ඇරුනම මේ දේ හොදින්ම දන්නේ ඔබ විතරයි කියන එක දැන් ඔප්පු වෙලා ඉවරයි.. විලියම්ස් පවුලේ මරණයක් වුන දවසේ ඔබ කිසිම සාක්ෂියක් ඉතුරු නොකලත් අපි ඉස්සෙල්ලාම විලියම්ස්ලගේ ගෙදර යන දවසේ ඔබ එහි සාක්ෂියක් ඉතුරු කරලා ගියා.."

" මම? නැහැ.. මම විලියම්ස්ලගේ ගෙදර ගිහින්ම නැහැ.."

" ඔබ කියන්නේ බොරු මිසිස් ස්ටෙලා.. ඔබ එදා උදේ අපි යන්න කලින් විලියම්ස්ලගේ ගෙදරට ගියා.. මොකද ඔබේ හිතේ සැකයක් තිබුනා මොනාම හරි සාක්ෂියක් එහේ තිබිලා අපිට හමුවේවිද කියලා.. ඒත් ඔබට වැරදුනේ එරික්ගෙන් ඉගෙන ගත්ත දේ හරි හැටි කරන්න බැරි වීම නිසා.. එදා අපි දැක්කේ ඔබේ අඩි සළකුණු.. මට පුළුවන් ඔබේ කමරය පරීක්ෂා කරලා ඒක ඔප්පු කරලා පෙන්නන්න.."

එරිකෝ සමග තමන් නිවැරදියැයි ඔප්පු කිරීමට වාද කරමින් වුන් ඇය හිටි හැටියේම නිහඬ වීම වැඩ්මිලර් පවුලේ හැමෝටම කුතුහලක් විය.. කාමරයේ ජනේලය අසලින් වූ පුටුවක හිදගත් ඇය හිසට අත තබාගෙන කල්පනා කරන්නට වූයේ ඇයට කියන්නට කිසිවක් නොමැති බව හඟවමිනි..

" ස්ටෙලා, මොකද්ද මේ වෙන්නේ? මේ හැම දේකටම වග කියන්න ඕන ඔයාද?"

" නැහැ රිචර්ඩ්, ඔයයි.. ඔයා තමයි මේ හැම දේකටම වග කියන්න ඕන.. ඔයයි වැරදි කාරයා.."

නිහඬවම කල්පනා කරමින් සිටි ස්‍ටෙලා ලගට ආදරයෙන් ලං වුන රිචර්ඩ්
ඇයව සනසමින් ඇය හා කතා කරන්නට උත්සාහ කලත් කෝපයෙන් ඔහු දෙසටම චෝදනා නැගූ ස්ටෙලා දෙස ඔවුන් හැමෝම බලාගෙන සිටියේ විමතියෙනි..

" මම?"

" ඔවු, ඔයා නිසයි මට මේ හැම දෙයක්ම කරන්න වුනේ.. මයිකල් ඔයගෙයි ලවුරාගෙයි ලමයෙක් නොවෙන්න මේ ප්‍රශ්ණ මේ විදිහට ඇති නොවෙන්න තිබුනා රිචර්ඩ්.. ඒ හන්දා ඔයයි මේ හැම දෙයකටම වග කියන්න ඕන.."

" ඒත් ඔයා මේ හැම දෙයක්ම හුඟක් කල් ඉදන්ම දැනන්නේ හිටියේ ස්ටෙලා.."

" ඔවු දැනන් හිටියා.. ඒත් මම බලාපොරොත්තු වුනේ නෑ රිචර්ඩ් අපේ දේපල වලින් වටිනම කොටස මයිකල්ට පවරන්න යාවි කියලා.. මට ඒ දේ බලාගෙන ඉන්න කොහොත්ම බැහැ.. ඒකයි මට මේ වගේ තීරණයක් ගන්න වුනේ.. ඔයයි මාව මේ දේට අසරණ කලේ රිචර්ඩ්.."

නිරුත්තරව අසල තිබු පුටුවකට බර වුන රිචර්ඩ් ඈය දෙස බලාගෙනම කල්පනා කරන්නට වූයේ නොදැනුවත්වම හෝ ඈ ඇතින් සිදුවුන දෙයින් වැඩ්මිලර් පවුලම නාමයට සිදුවුන කැළල ගැනය.. තවමත් තමන් කල දේ හරි යැයි හැඟීමෙන් රිචර්ඩ් දෙස බලා හිදි ඇය වසර ගනනක් ඇගේ හිතේ තිබුන වේදනාව හෙමින් පිට කරමින් සිටියාය..

" මයිකල් මගේ දරුවෙක් නොවුනත් මම කවදාවත් එයාට වෙනස් කමක් කලේ නෑ රිචර්ඩ්.. කාලයක් තිබුනා අපි ළමයෙක් වෙනුවෙන් ගොඩක් බලාගෙන හිටපු.. ඒ අතරේ ඔයා මට මේ දේ කියද්දී හිතට දුකක් ඇති වුනත් මම ඔයා එක්ක කේන්තියක් ගත්තේ නෑ.. ඒත් මයිකල් ඇවිත් ටික කාලයක් යද්දී අපි දෙන්නගෙම කියලා වික්ටොරියා අපි ලගට ආවම ඇත්තටම මම හුඟක් සතුටු වුනා.. ඒත් මම කවදාවත්ම මයිකල්ට වෙනසක් කලේ නෑ.. මයිකල්ගේ අම්මා ලවුරා කියන එක නොදැනෙන්න මම එයාව හොදට බලා ගත්තා.. ඒත් රිචර්ඩ් පස්සේ කාලේ ඔයා ගත්ත හුඟක් තීරණ වලට මගේ කොහෙත්ම කැමැත්තක් තිබුනේ නෑ.. ඒත් මගේ අදහස අහන්න තරම් වුවමනාවක් ඔයාටත් නොතිබුන හන්දා මම කොච්චර අසරණ වුනාද කියන එක ඔයා කොහෙත්ම දන්නේ නෑ.. ඔයා ඒ වගේ තීරණ නොගත්තනම් අද ඔයාට මේ වගේ පසු තැවීමක් ඉතුරු වෙන්නේ නෑ රිචර්ඩ්.."

" මිසිස් ස්ටෙලා ආවේගයයි කේන්තිය එක්ක ඔබ කරපු දේ බලපතර කම ඔබට තාම තේරෙන්නේ නැතුව ඇති.. ඒත් ඔබ හන්දා මයිකල් නිරපරාදේ දුක් විදින්න සිද්ද වුනා කියන එක ඔබ පිළිගන්නවද?"

" මයිකල් මේකට වරදකාරයා වෙයි කියලා මම කොහෙත්ම හිතුවේ නෑ මිස්ටර් එරිකෝ.. මම ඇත්තටම මයිකල්ට ආදරේ කලා.. මට වුවමනා වුනේ හැමදාම ඔහුට අපේ ලගම තියා ගන්න.. මයිකල්ට දේපලින් වැඩි කොටසක් ලැබුනටත් පස්සේ මේ හැම දේකම ඇත්ත දැන ගෙන මයිකල් විලියම්ස්ල ලගට යාවි කියන බය මගේ හිතට ආවා.. ඒකයි මේ හැම දෙයක්ම මම කලේ.. ඒත් අවාසනාවකට වගේ පුංචි දෙයක් හන්දා මයිකල් මේ හැම දෙයකටම වරදකාරයා වෙද්දී ඒ දිහා බලාගෙන ඉන්නවා ඇරෙන්න මට වෙන කරන්න දෙයක් ඉතුරු වුනේ නෑ.."

" එරික්ගේ කාමරේ තිබුණ ඔහු සංදර්ශණ වලට ගත්තු හැම දෙයක්ම වගේ ඔහුගෙන් සොරා ගත්තේ මිසස් ස්ටෙලා මේ හැම දෙයක්ම හොදින්ම සැළසුම් කරාට පස්සේ.. එහෙම නේද?"

" ඔවු.. මට වුවමනා වුනේ කිසිම දෙයක් ගැන සාක්ෂියක් ඉතුරු නොකර ඉන්න.. පළවෙනි වතාවෙදි මම සාර්ථක වුනා.. එරික් සංදර්ශණ වලට ගත්ත අත් වැසුම් සපත්තු හැම එකක්ම මම ඔහුට හොරෙන් අරන් මේ වෙනුවෙන්ම වෙන් කරලා තියා ගත්තා.."

" පොලීසියට එකම මරණයකින්වත් සැකයක් ඇති කර ගන්න ඇගිලි සළකුණක්වත් ඉතුරු නොවුනේ එහෙනම් ඒ නිසයි කියලා මම හිතපු දේ හරි.. ඇත්තටම ඔබ හැම දෙයක්ම හොදින්ම සැළසුම් කරලා තිබුනා මිසිස් ස්ටෙලා.. මේ මොහොත වෙනකම්ම මයිකල් නිවැරදී කියන දේ මට තේරුණත් ඇත්තටම කවුද වැරදිකාරයා කියන දේ තීරණය කරන්න මටත් අපහසු වෙලා තිබුනේ.. ඒත් එරික් නිසා අද ඒ දේත් පහසු වුනා.."

පවුලේ හැම දෙනෙක්ම වාගේ සිදුවෙමින් තිබු දේවල් ගැන විමතියෙන් බලා ඉදියදී සැනසුම් සුසුමක් හෙලන්නට ලොරේන්ට පමණක් හැකි වූයේ මයිකල් නිවැරදී යන්න ඇගේ හිත හොදින්ම දැන සිටි නිසාවෙන්ය.. හැමෝගේම නිහඬ බව කාමරය පුරාවට රැදෙද්දී වැඩ්මිලර් පවුලේ අයට එහි තනිවෙන්නට ඉඩ හල එරිකෝ ඉන් පිටත් වුනේ බර්මින්හැම් පොලීසියට දුරකථන ඇමතුමක්ද ගනිමින්ය..

" අපි කොහෙත්ම හිතුවේ නැති දෙයක්නේ එරිකෝ වුනේ.. ඔයාට කොහොමද් ස්ටෙලා ගැන සැක හිතුනේ?"

දුරකථන ඇමතුම නිමාකරමින් ඉහල මාලයට යන පඩිපෙන නගිමින් වුන් එරිකෝ අසළට ආ සිම්රන් ඔහුගෙන් ඒ ගැන විමසන්නට වූයේ කිසිම මොහොතක ස්ටෙලා ගැන සැකයක් ඇති බවක් එරිකෝ සදහන් නොකල නිසාවෙනි.. ඇය හා යාන්තමින් සිනා සෙමින් කාමරය වෙතට ගිය එරිකෝ ඇයට සියල්ලක්ම පැහැදිළි කලේය..

" ඇත්තටම මේ වෙනකම්ම මට ස්ටෙලා ගැන සැකයක් තිබුනේ නෑ සිම්රන්.. මම හිතුවේ රිචර්ඩ් මේ හැම දෙයකටම වැරදි කාරයා කියලා.. ඒත් මට ඒකට ඔහුට චෝදනා කරන්න පැහැදිළි සාක්ෂියක් නොතිබුන නිසයි මම එරික්ගෙන් ඊයේ මේ උදවුව ඉල්ලුවේ.. මම ඇත්තටම බලාපොරොත්තු වුනේ රිචර්ඩ් මගේ මේ පරීක්ෂණයෙන් සමත් වෙයි කියලා.. ඒත් වුනේ මම නොහිතපු දෙයක්.. තවත් ඒ ගැන හිතන්න කාලයක් ඉතුරු කරන්න වුවමනාවක් නොතිබුන නිසාමයි මම කෙලින්ම ස්ටෙලාට චෝදනාව එල්ල කලේ.."

" ඒත් එරිකෝ ජෝර්ජ්.. අපි ඔහුවත් මේකට සැක කලානේ.. මතකද එදා අපි ඔහුගේ සපත්තු වල දැක්ක මඩ පැල්ලම්.."

" ඔවු සිම්රන්.. ඒ ගැන හිතේ කුතුහලයක් මට නොතිබුනාම නෙමෙයි.. මොකද ස්ටෙලාට මම එල්ල කරපු චෝදනාව වැරදි නම් අනිවාර්යෙන්ම ඇත්ත අපරාධකාරයා අපි කරපු හැම දෙයක්ම ගැන දැන ගන්නවා.. ඒ වගේම අපිට මේ වලවුවෙනුත් යන්න වෙනවා.."

" එහෙනම් එදා අපි ගැන පොලීසියට දන්වන්න ඇත්තෙත් මිසිස් ස්ටෙලාම තමයි.."

" ඔවු සිම්රන් ඒත් මිසිස් ස්ටෙලාම තමයි.. ඇගේ හිතේ තිබුන බය නිසයි ඇය එදා අපිට කලින් එහෙ ගියේ වගේම අපි ගැන පොලීසියට දැනුම් දුන්නෙත්.. මොකද ඇයට වුවමනා වෙන්න නැහැ අනවශ්‍ය අවදානමක් ගන්න.. ඒත් ඇය කල දේම අපිට පහසුවක් වුනා.."

" ඔයා ඊලගට මොකද කරන්නේ?"

" මම බර්මින්හැම් පොලිසියට හැම දෙයක් ගැනම විස්තර කලා.. වැඩි වෙලාවක් යන්න කලින් ඔවුන් මෙතනට ඒවි.. පොලිස් පරීක්ෂණ ආයෙම පටන් ගන්න නිසා මයිකල්ට නිදහස ලැබේවි.. ස්ටෙලා වරද පිළිඅරන් තියෙන නිසා ඒක ඒ තරම්ම සංකීර්ණ දෙයක් වෙන එකක් නෑ.."

" ඒක නම් ඇත්ත.. සාක්ෂි මත පදනම්ව ස්ටෙලාව වැරදි කාරයා කරන එකනම් ගොඩක් අමාරු දෙයක්.. ඇගේ පාපොච්චාරණය තියෙන නිසා ඒ දේ පහසු වේවි.."

" ස්ටෙලා ඉක්මන් නොවුනානම් මේ ප්‍රශ්ණේ මීට වඩා වෙනස් විදිහකට විසද ගන්න තිබුනා කියලා මට හිතෙනවා සිම්රන්.. ඒත් දැන් ඒ දේවල් වලින් වැඩක් නැහැ.. අපි ආයෙම ලන්ඩන් යන්න සූදානම් වෙමු.. මම ඉන්දියානු සංස්කෘතියේ මංගල්‍යක් තවම දැකලා නැහැනේ.. ඒ හන්දා ඒකට ලෑස්ති වෙන්නත් ඕනනේ.."

" අහ් ඇත්තද? ඒ කාගෙද දන්නේ නෑ.." 


නිමි..



මීලගට එරිකෝ හන්ටර් තුලින්,


විශේෂයී : Courtezan කියන්නේ මොකද්ද කියලා කට්ටිය දන්නවායැයි සිතමි.. ;)

Thursday, 4 July 2013

එරිකෝ හන්ටර් - The Flying Man 6



රාත්‍රී දහයට ලංවෙමින් තිබියදී වැඩ්මිලර් වලවුවේ ප්‍රධාන ගේට්ටුවෙන් ඇතුල් වුන වාහනය හෙමින් දොරටුව අසලට එන තුරුම එරිකෝගේ හිතේ රැදුනේ තරමක නොසන්සුන් බවකි.. කලින් හැම අවස්ථාවකම මෙන් වාහනය ඇවිත් නතර වන විට නිවසේ ඉදිරියට පැමිණෙන ජෝර්ජ් අද නොමැති වීම එරිකෝගේ හිතට සහනයක් විය.. කලබලයෙන් මෙන් වාහනයෙන් නික්මුන ඔවුන් නිවස තුලට ආවේ රියැදුරුගේ රාත්‍රී සුභපැතුමට පිළිතුරක්ද නොදෙමිනි..

ආලින්දය දිගේ ටික දුරක් ඇවිදන් ආ ඔවුන් වැඩ්මිලර් පවුලේ අයගේ කාමර තිබු කොරිඩෝව ලග මොහොතක් නතර වී කාමර දෙස බොහෝ අවදානයෙන් බලාගෙන සිටියේ එරික්ගේ කාමරය කුමක්දැයි සොයාගැනීමට තිබූ අපහසුව නිසාවෙනි.. ඉහල මාලයේ තිබූ අමුත්තන්ගේ කාමර වලට වඩා එකි නෙකට බොහෝම කිට්ටුවෙන් තිබුන ඔවුන්ගේ පෞද්ගලික කාමර නිසාවෙන් ඒවාට පිවිසී වැඩි කාලයක් ගත කිරීම අපහසු බව එරිකෝට හැඟුනි..

" එරිකෝ අපි කොහොම්ද එරික්ගේ කාමරේ හරියටම හොයාගන්නේ.. අනිත් එක මේ හැම එකක්ම අඟුළු දාලා තියෙන්නේ.."

" ඔවු සිම්රන්, ඒක ඔයා මට බාර දෙන්න.. ඔයාට පුළුවන්නම් දැන් ගිහින් ජෝර්ජ්ව හොයා ගන්න.."

" ජෝර්ජ්ව හොයා ගන්න? මම හිතුවේ අපි ඔහුව මඟහරිනවා කියලා.."

" ඒකම තමයි සිම්රන් වෙන්න ඕන.. ඒත් බැරිවෙලාවත් ජෝර්ජ්ට සැකයක් ඇති වුනොත් මේ දේ හරියට කරන්න වෙන්නේ නෑ.."

" හරි එරිකෝ එහෙනම් මම යන්නම්.."

කොරිඩෝවට ඈතින් වූ මුළුතැන්ගෙය දෙසට ඇවිදන් යන සිම්රන් දෙස බලා උන් එරිකෝ ඔහුගේ සාක්කුවේ තිබූ කුඩා යතුරු කිහිපයකින් කාමර වල දොරවල් විවර කරන්නට උත්සාහ දැරීය.. අසාර්ථක උත්සාහයන් කිහිපයකට පසුව විවර වුන එක් දොරකින් කාමරයට ඇතුළු වුවත් එය එරික්ගේ නොවන බව හැගෙන්නට එරිකෝට වැඩි වේලාවක් ගත නොවීය..

ශබ්දයක් නොනැගෙන පරිද්දෙන් ඉන් නික්මුන එරිකෝ අනෙක් කාමර වල දොරඟුළුද සෙමින් පරීක්ශා කරන්නට විය.. තෙවන වර ඇතුළු වුන කාමරය එරික්ගේ බව හඳුනා ගන්නට එහි බිත්ති පුරා රදවා තිබූ ඔහුගේ සංදර්ශණ වල ඡායාරූප ප්‍රමාණවත් විය.. එතරම්ම කාලයක් ඉතිරි වී නැති බව දැනුන මුත් සීරුවෙන් තම නිරීක්ෂණයන් ඇරඹු එරිකෝ කාමරය පුරාවට එල්ලා තිබූ ඡායාරූප දෙස හා කාමරයේ පසෙකින් වූ පොත් රාක්කය දෙස හොදින් අවදානය යොමු කලේය.. මැජික් ශිල්පය ගැන ලියවුන බොහෝමයක් පොත් අතර අහම්බෙන් මෙන් හසු වුන පුද්ගල බන්ධනය පිළිබද වූ පොත එරිකෝගේ හිත වැඩි වශයෙන් ඇද ගන්නට සමත් විය..

පොත් රාක්කය අසලම පසෙකින් තබා තිබු එරික් ලද සම්මාන සමුහය  එරිකෝ බොහෝ ඕනෑ කමින් පරික්ෂා කලේය.. වසර ගනනාවක හිද විවිධ අංගයන් සදහා ඔහුට ලැබුන සම්මාන ඔහුගේ දක්ශතාව ගැන තව දුරටත් තහවුරු කරන්නට සමත් වීය.. ඉතිරිව තිබුන කෙටි කාලයේ අනෙකුත් දේ ගැන හොද අවදානයක් යෙදුවත් වැදගත් වේ  යැයි සිතිය හැකි දෙයක් හොයාගන්නට අපොහොසත් වීම එරිකෝගේ හිතට කණස්සල්ලක් විය.. එරික්ගේ දෑත් වල නිතරම රැදුන අත්වැසුම් පවා එරිකෝට අවශ්‍ය වූ පරිද්දෙන් සොයා ගන්නට නොහැකී වීම ඔහුගේ බලාපොරොත්තු කඩ කරන්නක් විය..

වැඩි වේලාවක් නොරැඳිම කාමරයෙන් පිටත් වුන එරිකෝ කොරිඩෝව දිගේ ඇවිදන් යමින් සිම්රන්ව සොයන්නට වූයේ අසම්පූර්ණව වුවත් ඔහු සිතා සිටි කාරණාව නිමාවූ නිසාවෙන්ය.. කොරිඩෝවේ ඈත කෙලවරින් කලබලයෙන් මෙන් එමින් සිටි සිම්රන්ගේ මුහුණේ තිබුන කුතුහලයෙන් යුතු පෙනුම ඈත තියාම හොදින්ම දැක ගන්නට එරිකෝට පුළුවන් විය..

" ඇයි සිම්රන් මොකද උනේ?"

" නැහැ එරිකෝ.. ජෝර්ජ් අහපු සමහර දේවල් වලට මට දෙන්න උත්තරත් නැති වුනා.. මිනිහත් හොද ඔයා වගේම රහස් පරීක්ශණ වැඩ වලට.."

" ඉතින් ඔයා කියපු දේවල් මිනිහා පිළිගත්තද?"

" මම කිවුවා ඔයාට ටිකක් සනීප මදී ඒ හන්දා කෝපි එකක් ඉල්ලන්න ආවේ කියලා.. ඒ හන්දා අපි ඉක්මනට කාමරේට යමු.. තව ටිකකින් ජෝර්ජ් එන්න පුළුවන් ඔයාට කෝපි අරන්.."

" ඒක හොදයි අපිට කතා කරන්න තියෙන දේවල් කෝපි එක්ක බොන ගමන්ම කතා කරන්න ලැබෙන එක.."

" එරිකොට ඕන කරපු දේවල් හම්බුනාද?"

ඉහල මාලයේ පඩිපෙල නඟිමින් උන් එරිකෝ ඊට පිළිතුරක් දීමට කාලය වැය නොකරම ඔවුන්ට වෙන් කර තිබූ කාමරය වෙත ගිය එරිකෝ දොරත් හොදින් වසාගෙන කාමරයේ පසෙක වූ පුටුවෙහි හිද ගත්තේ සිම්රන්ට හැම දෙයක්ම විස්තර කිරීමේ අරමුණිනි..

" නැහැ සිම්රන්.. දැන් නම් මම බලාපොරොත්තු වුන හැම දෙයක්ම කර ගන්න බැරි වුනා.."

" ඇයි එරිකෝ දැන්නම් කිවුවේ?"

" ඔවු සිම්රන්.. ඒත් අපි දැන් ඉන්නේ තවත් ප්‍රශ්ණේක.."

" ඒ මොකද්ද?"

" සිම්රන්ට මතකද මම වාහනේ යද්දී රියැදුරාගෙන් අහපු දේවල්.. ඔහු කියපු දේවල් හොදට මතකනම් අපි විලියම්ස්ලගේ ගෙදර ගිය වෙලේ ඒ ගැන පොලීසියට දන්වන්න ඒ අහල පහල කවුරුවත්ම හිටියේ නෑ කියන එක ඔහුගේ කතාවෙන් හොදටම පැහැදිළි වුනා.."

" ඔවු, ඒක මට මතකයි.. මම හිතන්නේ ඔහුම වෙන්න ඇති මේ ගැන කියන්න ඇත්තේ.."

" නැහැ සිම්රන්.. මටත් ඒ ගැන දැන ගන්න තිබුන වුවමනාව නිසා තමයි මම වාහනෙන් බැස්ස වෙලාවේ මට ඉක්මනට යන්න වුවමනා වුනොත් කියලා ඔහුගෙන් ජංගම දුරකථනයේ අංකය ඉල්ලුවේ.. ඒත් මට ඔහු ගැන සැකයක් තියා ගන්න වුවමනා නෑ කියලා ඔප්පු වුනේ ඔහුට දුරකථනයක්වත් නෑ කියලා කියපු වෙලාවේ.."

" ඒත් ඔහු බොරුවක් කිවුවා වෙන්න බැරිද?"

" මම හිතන්නේ නෑ සිම්රන්.. මොකද මම ඒ ගැන ඇහුවේ වෙනමම අවස්ථාවක හන්දා ඒ ගැන සැකයක් ඔහුට එයි කියලා හිතන්න අමාරුයි.."

" එතකොට අපි ගැන පැමිණිල්ල කලේ කවුද?"

" වැඩ්මිලර් පවුලෙම කෙනෙක් සිම්රන්.."

" ඒ කියන්නේ රිචර්ඩ්ද? එරිකෝ කොහොමද එහෙම කියන්නේ?"

" මේ පවුලෙ අය ඇරෙන්න අපි විලියම්ලගේ ගෙදර ගිය බව වෙන කවුරුවත් දන්නේ නෑ.. අනික රියැදුරා කියපු දේවල් එක්ක අපි නොදන්න කෙනෙක් ඒක කලා කියලා හිතන්න බෑ සිම්රන්.. ඒත් ඒ රිචර්ඩ්මයි කියන්න අපිට බෑ.. මොකද අපි එහේ ගිය බව මේ ගෙදර හැම කෙනෙක්ම වගේ දන්නවා.. කොටින්ම ජෝර්ජ් උනත්.. ඒ හන්දා ඒකට අපේ සැකය හැමෝටම වෙන් කරන්න වෙනවා.."

" හුඟක් දේවල් පැහැදිළි කරන්න තාමත් අමාරුයි කියලා හිතෙනවා.."

එරිකෝ පිළිතුරක් දෙන්නට සැරසෙත්ම ඔවුන් රැදී සිටි කාමරයේ දොර අසලින් ජෝර්ජ්ගේ කටහඬ ඇසුන නිසාම නිහඬ වුන එරිකෝ ඇදට විත් ඔහුගේ දෑස මොහොතකට පියා ගනිද්දි සිම්රන් දොර අසලට පැමිණියේ ජෝර්ජ් කෝපී සාදාගෙන ආ බව ඈ හොදින්ම දැන සිටි නිසාවෙනි..

" මිස්ටර් එරිකෝට දැන් කොහොමද?"

" දැනටනම් නිදි ජෝර්ජ්.. මම මේක එයාට දෙන්නම්.. සංදර්ශණයට ගිය අය ආවද ජෝර්ජ්?"

" ඔවු දැන් ටික වෙලාවක්.. ඔවුන් ආව ගමන් ඇහුවේ ඔබලා ගැන.. ඔවුන්ට නොකියා ආව එක ගැන මිස්ටර් වැඩ්මිලර් ඉන්නේ අමනාපයෙන්.."

" හරි ජෝර්ජ් අපි ඒ ගැන එයාලා එක්ක කතා කරන්නම්.."

" රෑ කෑම මේසයට එන්න අමාරුනම් කලින්ම කියන්න මිසිස් හන්ටර්..  එකතකොට අපිට පහසුයි.."

" හරි ජෝර්ජ්.. ගොඩක් ස්තූතියි.."

කාමරයේ දොර වසා දැමු සිම්රන් ඇගේ ඇතැති වූ කෝපි කෝප්ප දෙකද සමග නැවත පැමිනෙන අයුරු එරිකෝ බලා සිටියේ සිනාමුසු මුහුණෙනි.. ඔහුට සුපුරුදු පුටුවට ආ එරිකෝ කෝපි කෝප්පයකද රස බලමින් සිම්රන් සමග යලි කතාවට වැටුනේය..

" එරික්ගේ කාමරෙන් වැදගත් තොරතුරක් ලැබුනද එරිකෝ?"

" නෑ සිම්රන්.. මම  බලාපොරොත්තු වුන තරමේ දෙයක් හොය ගන්න බැරි වුනා.. ඒත් එරික් කියන්නේ අපි හිතනවාට වැඩිය දක්ශ‍යෙක්.. ඒක මට හිතුනේ සංදර්ශණය අතරවාරයේමයි.."

" එරික් අන්තිමට කල දේ ඇත්තටම කරපු දෙයක්ද නැත්නම් මවා පෑමක්ද එරිකෝ?"

" නෑ සිම්රන් එරික් ඒක ඇත්තටමයි කලේ.. මම දන්න තරමින් මිනිස්සුන්ගේ හිත හුඟාක් දියුණු කලාම ඒ වගේ දේවල් කරන එක අපහසුවක් නෙමෙයි.. අනික මම එරික්ගේ කාමරේ දැක්ක පොත් පත් වලින්ම තේරුණා ඔහු ඒ ගැන හුඟාක් පරීක්ෂණ කරලා තියෙන බව.. ඒ හන්දම ඔහු ඒ ගැන ප්‍රවීණ තාවයකට ආව කියන එක අපිට පිළිගන්න පුළුවන් සිම්රන්.."

" එහෙනම් එරිකෝ අපි අහම්බෙන් දැක්ක අඩි සළකුණු එරික්ගේ වෙන්න පුළුවන් නේද?"

" මගේ හිතෙත් තියෙන සැකය ඒකම තමයි සිම්රන්.."

" එරික් මේ මිණිමැරුම් වලට සම්බණ්දයි කියලා අපිට හිතන්න පුළුවන් නේද එරිකෝ.. බලන්න විලියම්ස් පවුලේ වුන එකම ඝාතනයකින්වත් මිනිමරුවව හොයා ගන්න පුළුවන් කිසිම සාක්ෂියක් හමුවුනේ නෑ.. ඒ එරික් නිතරම අත්වැසුම් පාවිච්චි කරන නිසා වෙන්න බැරිද? අනිත් දේ කිසිම විදිහක සාක්ෂියක් ඉතුරු කරන්න වුවමනා නැති නිසා එරික් සංදර්ශණයෙදි පෙන්නපු හැකියාව පාවිච්චි කරා වෙන්න බැරිද?"

" ඇත්තටම මම සතුටු වෙනවා සිම්රන්ගේ නිරීක්ෂණයන් ගැන.. ඔවු සිම්රන් අපිට එහෙම හිතන්න තියෙන ඉඩකඩ වැඩී.. ඒත් තාම වැරදිකාරයා එරික්මයි කියලා පිළිගන්න මගේ හිත සූදානම් නැහැ සිම්රන්.."

" ඒ ඇයි එරිකෝ.. අපිට ප්‍රමාණවත් තරම් සාදක තියෙනවනේ.."

" නැහැ සිම්රන්.. එරික්ගේ කාමරේට ගිය වෙලාවේ ඔහුගේ හැම සංදර්ශණයකම පුවත්පත් වල ගිය විස්තර එකතු කරලා හදපු සමරු සටහන මම දැක්කා.. විලියම්ස් පවුලේ මරණ හැම එකක්ම වුන දවස වෙද්දී එරික් ඉදලා තියෙන්නේ අයර්ලන්තයේ සංචාරයක.. ව්ලියම්ස් පවුලේ මරණයන් වුන දවසට පස්සේ දවසේ එරික් සංදර්ශණයක් කරලා තියෙනවා අයර්ලන්තයේ.."

" ඒත් මරණයන් වෙන්නේ සංදර්ශණයට කලින් දවසේ නිසා අපිට ඒත් එරික්ව සැක කරන්න තියෙන ඉඩ  ඇහිරෙනවා සිම්රන්.."

" ඔවු එරිකෝ ඒත් බර්මින්හැම් වල ඉදන් අයර්ලන්තයට යන එන ඒ තරම්ම කාලයක් ගත වෙන දෙයක් නෙමෙයි නේද? ඒහන්දා එරික් එතනත් සාක්ෂියක් ඉතුරු නොකර මේ හැම දෙයක්ම සැළසුම් කරා වෙන්න පුළුවන් නේද?"

" ඒ හැම දේකට චෝදනාව නගන්න කලින් අපි ඒ ගැන එරික්ගෙන්ම දැන ගන්න එක හොදයි සිම්රන්.."

" හ්ම්ම්, ඒත් ඒක කොහොමද කරන්නේ?"

" සිම්රන් අපි තව ටිකකින් වැඩ්මිලර් පවුලේ අය එක්කම රෑ කෑම මේසයට යමු.. බොහෝ දුරට එරික් එතන ඉන්න පුළුවන්.. එ හෙම වුනොත් අපිට පහසුයි.."

" හරි එරිකෝ.."

කතාබහ අතරෙම නැවතත් ජෝජ්ගේ කටහඬ ඔවුන් සිටි කාමරයේ දොර අසලින් අසීම දැන් හුරු පුරුදු නිසාම දොර අසලට ගිය සිම්රන් ඔහු සමග කතාබහන් නැතුව බලා හිදිනු දැකීම එරිකෝට ගැටළුවක් විය..

" ම්ස්ටර් එරික්ට සර් එක්ක ටිකක් කතා කරන්න වුවමනායිලු.. ඔබලාට ඒ සදහා විවේකයක් තියෙනවද?"

බලාපොරොත්තු නොවුන වෙලාවක එරික්ගේ පැමිණිම පුදුමයක් වුවත් එරිකෝ තරමක් එයට කැමත්තක් දක්වන්නට වූයේ ඔහුට වුවමනා දේවල් නිදහසේ දැන ගැනීමට ලැබෙන ඉඩ ගැනඔහුට ඇති වුන හැගීම නිසාවෙන්ය..

" එන්න එරික්.. ඇයි හදිස්සියෙම?"

කාමරය තුලට කැදවාගෙන ආ ඔහුට අසුනක් පිළිගන්නවමින් ඔහු සමගම හිද ගත් එරිකෝ ඔහුගේ අතැති වූ කෝපි කෝප්පය රස විද නිමා කරන්නට විය..

" මිස්ටර් එරිකෝ මාව විලියම්ස් පවුලේ මරණ වලට සැක කරනවා නේද?"

එක වරෙම ඔහු ඇසූ දෙය එරිකෝ කිසිසේත්ම බලාපොරොත්තු නොවූවක් වූ නිසාම ඊට පිළිතුරක් දෙන්නට මද වේලාවක් ගන්නට එරිකෝට සිදුවිය..

" ඒක මේ රාජකාරියේ හැටියක්නේ එරික්, ඔබ විතරක් නෙමෙයි මට මේ ගෙදර හැම කෙනෙක්වම සැකයි.."

" එහෙනම් මම හිතනවා ඔබ මගේ කාමරය වගේම අනික් අයගේ කාමරත් පරීක්ෂා කරන්න ඇති කියලා.."

" නැහැ දැනට පරීක්ෂා කලේ ඔබේ කාමරය විතරයි.. මම දන්නවා ඒක ඔබේ පෞද්ගලිකත්වයට ප්‍රශ්ණයක් කියන එක.. නමුත් මේ රාජකාරියේ හැටියට එහෙම දේවල් කරන්න සිද්ද වෙනවා.. ඒත් ඔබ කොහොමද ඒ ගැන දන්නේ?"

" මම කාමරේ විදුලි පංකාවට යටින් කුඩා කැමරාවක් සවි කරලා තියෙන්නේ.. මම මෙහේ ආවොත් කාමරයෙන් පිටත් වෙන හැම වෙලාවකම ඒක ඔන් කරලයි තියන්නේ.."

" ඇයි මෙහේ එන හැම වෙලාවකම කියලා කිවුවේ?"

" මේක ටිකක් අමුතු වලවුවක් එරිකෝ.. මම මේ පවුලට එකතු වුන කාලයට වඩා දැන් හුඟාක් දේවල් වෙනස් වෙලා.. විශේෂයෙන්ම මෙහේ ඉන්න මිනිස්සු.."

" එරික්ට එහෙම කියන්න මොකක් හරි හේතුවක් තියෙනවද?"

" ඔවු එරිකෝ.. මේ පවුලට එකතු වුන අළුතම මම හිතුවේ මගේ අධ්‍යනයන් වලට හොදම පරිසරය තියෙන්නේ මෙහේ කියලා.. ඒ හින්දම මම රිචර්ඩ්ගේ අවසරයෙන් මට වුවමනා හැමදේම මම මෙහේ අත්හදා බලන්න පුරුදු වුනා.. සමහරක් වෙලාවට රිචර්ඩ් වලවුව පිටුපස තියෙන කුඩා ශාලාව මට ඒ වෙනුවෙන් වෙන් කරලා පවා දුන්නා.. ඒත් ටික දවසක් යද්දි මට තේරුණා මේ දේවල් ගැන උනන්දු වෙන්නේ මම විතරක්ම නෙමෙයි කියන එක.. මේ වලවුවෙම තවත් කවුරු හරි කෙනෙක් මෙගේ ලිපි ලේඛණ පාවිච්චි කරන බව මට දැනුනා.. ඒකයි මම මේ වගේ දෙයක් කරන්න හිතුවේ.."

" ඉතින් එරික් ඒ කවුද කියන එක හොයා ගත්තද?"

" දවස් දෙක තුනක් යනකම්ම ඒ ගැන කිසිම දෙයක් මට හොයාගන්න බැරි වුනා.. ඒත් පස්සේ මම දැක්ක දේවල් ගැන මට හිතා ගන්නවත් බැරි උනා.. රිචර්ඩ් වගේම මයිකලුත් මගේ දේවල් වලට උනන්දුයි කියලා මට තේරුණේ දවසක් ඔවුන් මගේ පොත් රාක්කය අවුස්සනවා වීඩියෝවක සටහන් වෙලා තිබුන නිසා.."

" ඉතින් එරික් ඒ ගැන ඇහුවද?"

" ඔවු, දවසක් මට රිචර්ඩ් මගේ කාමරේ ඉද්දීම හමුවුනා.. එදා ඔහු කිවුවේ මේ දේවල් ඉගෙන ගන්න අසයි කියලා.. රිචර්ඩ් විතරක් නෙමෙයි පවුලේ හැම කෙනෙක්ම වගේම ඒකට ආසයි කියලත් කිවුවා.. ඒ කතාව මම පිළි නොගන්නවා වුනත් අකමැත්තෙන් වගේ මම ඒකට කැමති වුනා.."

" එතකොට එරික් වැඩ්මිලර් පවුලේ අයට මේ දේවල් හැම එකක්ම ගැන කියලා දුන්නද?"

" එහෙම ටික කාලයකින් මේ හැම දෙයක්ම කියලා දෙන්න කොහෙත්ම බැහැ එරිකෝ.. ඒත් මම පොඩි දේවල් කියලා දුන්නා.. මගේ වටිනාම ලිපිලේඛන නිතරම මගේ ලග තියාගෙන මම අනික් දේවල් ඔවුන්ට නිතරම කියවන්න අවසර දුන්නා.."

" ඉතින් ඔවුන් හොද ගෝලයෝ වුනාද?"

" නැහැ එරිකෝ.. මයිකල්ට ඇරෙන්න අනිත් කාටවත් මේ දේවල් දැන ගන්න ඇත්තටම උනන්දුවක් තිබුනේ නෑ කියලා මට තේරුණා.. අනිත් හැමෝටම වැඩිය මයිකල් නිතරම ඉස්සරහින් හිටියා.."

" එතකොට විලියම්ස් පවුලේ මරණ වෙද්දී එරික් කොහේද හිටියේ?"

" විලියම්ස් පවුලේ මරණ ගැන මට ආරව්චිය එද්දී මම හිටියේ අයර්ලන්තයේ.. ඊට පහුවදාම මගේ සංදර්ශණය.. මේ මරණ මට පෞද්ගලිකවම මට ඒ තරම්ම වැදගත් දෙයක් නොවෙන හන්දා මම මගේ සංචාරය ඉවර කරලා එද්දී හිතුවට වඩා හුඟාක් දේවල් මෙහේ වෙනස් වෙලා තිබුනා.."

" ඒ මොනවද?"

" විලියම්ස් පවුලේ මරණ එක්ක වැඩ්මිලර් පවුලේ හුඟාක් ප්‍රශ්ණ ඇති වෙලයි තිබුනේ.. විශේෂයෙන්මෙ රිචර්ඩ් මයිකල් එක්ක හුඟාක් වෙලාවට මේ දේවල් ගැන මත බේද ඇති කර ගන්නවා මම දැකලා තිබුනා.. හුඟක් දෙනෙක් චෝදනා කලේ මයිකල්ට නිසා මයිකල් ඒ ගැන හිටියේ තරහින්.. හැබැයි මයිකල් වැරදි කාරයා කියලා මට නම් හිතෙන්නේ නෑ.."

" ඇයි එරික් එහෙම කියන්නේ?"

" මම දන්න තරමින් මයිකල් විලියම්ස් පවුල එක්ක තිබුනේ හුඟක් කිට්ටු සම්බණ්ධතාවයක්.. සේවකයෝ විදිහටත් වැඩිය හොද යාළුවෝ වගේ මයිකල් ඔවුන්ව ඇසුරු කලේ.. ඉතින් පුංචි සිද්ධියක් නිසා මෙහෙම දෙයක් මයිකල් කරාවියි කියලා මම හිතන්නේ නෑ.."

" එතකොට එරික් කා ගැනද සැක කරන්නේ?"

" එහෙම හරියටම කියන්න බෑ එරිකෝ.. මම දන්නේ මමවත් වික්ටෝරියාවත් මේ කිසිම දෙයකට සම්බන්ධ නෑ කියන එක.. මොකද පහුගිය කාලෙම අපි බර්මින්හැම් වල හිටියේ කෙටි නිවාඩු වලට විතරක් නිසා.. එරිකෝ මගේ කාමරය පරීක්ෂා කරා කියලා මං දැන ගත්ත නිසයි මෙහෙම හරි මම කතා කරන්න ආවේ.. මොකද මම ආයෙම හෙට හවස පිටත් වෙනවා.."

" එරික් විවෘතව මේ ගැන කතා කරන්න ආව එක මම අගය කරනවා.. තව දෙයක් ඔබෙන් මේ දේවල් ඉගෙන ගන්න හැමෝම ආවද?"

" ඔවු හැමෝම වගේ.. වැඩියෙන්ම උනන්දුව තිබුනේ මයිකල්ටයි රිචර්ඩ්ටයි.. ස්ටෙලායි ලොරේනුයි ආවත් ඔවුන් මේක පවුලේ අය එකට ගත කරන වෙලාවක් විදිහට සැලකුවා මිසක් ඒ ගැන ලොකු උනන්දුවක් දැක්කුවේ නෑ.."

" ඔබේ නැති වුනා කිවුව පොත් ආයෙම හම්බුනාද?"

" මේ වෙන තුරුත් නැහැ.. ඒ හුඟක් පොත් තිබුනේ පොලවින් ඉහලට
එසවිලා ගමන් කරන හැටි ගැන.. මට හිතා ගන්න බෑ ඒ දේවල් කාටද වැදගත් වෙන්නේ කියලා.. මොකද ඒක ලේසියෙන් කරන්න පුළුවන් දෙයක් නොවෙන හන්දා.."

" එරික් ඒ දේවල් වැඩ්මිලර් පවුලේ අයට ඉගැන්නුවද?"

" නැහැ.. ඒත් ඒ ගැන දැන ගන්න හැමෝටම වගේ තිබුනේ ලොකු උනන්දුවක්.. කීප වතාවක්ම මම ඒ ගැන සරළව කිවුවා වුනත් වැඩි දෙයක් කියලා දෙන්න කාලයක් මට ආවේ නැහැ.."

" එරික්ගෙන් මට උදවුවක් ඕන.. බර්මින්හැම් වලින් ඔබ ආයෙම පිටත් වෙන්න කලින් වෙනද වගේම පවුලේ අය එක්ක මේ දේවල් ගැන කතා කරන්න වෙලාවක් වෙන් කර ගන්න.. ඒකට මටත් ආරාධනා කරන්න.. මං ඒ වෙලාවට කරන ඉල්ලීම් ඔබට ඉටු කරන්න පුළුවන් වේවි කියලා මම හිතනවා.."

" හොදයි එරිකෝ.. එහෙනම් හෙට උදේ දහය විතර වෙද්දී ඔබලා දෙන්නම එන්න රිචර්ඩ්ගේ කාර්‍යල කාමරයට.. අපි හුඟක් වෙලාවට එකතු වුනේ එතනදි.. මම එහෙනම් දැන් ඔබලාට සමු දෙන්නම්.. හෙට ගමනට වුවමනා කරන දේවල් සූදානම් කර ගන්න තියෙනවා.."

"හරි එරික්.. ඔබට ගොඩක් ස්තූතියි.. හෙට උදේ අපි මුණ ගැහෙමු.."

එරික් කාමරයෙන් නික්ම යන තුරු බලා හිදි එරිකෝ වාඩි වී හිදි පුටුවට හොදින් බර වෙමින් ඔහු කී දේවල් ගැන ආයෙම වතාවක් හිතන්නට විය..

" එරික් ගැන අපි හිතුව දේවල් එහෙනම් වැරදී නේද එරිකෝ?"

" හ්ම්ම්.."

" එරික් නෙමෙයි නම් කවුද මේ දේවල් කලේ?"

" අපිට ඒ දේවල් හෙට දැන ගන්න පුළුවන් සිම්රන්.."