බඩ රිද්දපු පුඩිම

කට්ටිය ඉතින් දන්නවනේ මම වැඩ ෆාමසියේ කියලා.. ඒක ඉතින් අමුතුවෙන් කියන්න ඕන දෙයක් නෙමෙයි නේ.. කලින් දවසකත් මම පෝස්ට් එකක් දාපු වෙලේ කිවුවා මතක ඇති ෆාමසියේ බෙහෙත් ගන්න තියෙන ලැබ් එකේ කෑම බීමනම් අපිට කවදාවත් වරදින්නේ නෑ කියලා..

බලාගෙන යද්දි ඉතාලියේ මිනිස්සු හරි හොදයි.. ගෙදර මොනා හරි කෑමක් හැදුවම බෙහෙත් ගන්න දවසක් නොවුනත් දුවගෙන ඇවිත් ඒකෙන් ටිකක් අපිට දීලා තමයි යන්නේ.. අඩුම ගානේ බිස්කට් එකක්වත් නැති වෙන දවසක් නම් නෑ.. ඒකනේ මම හවස මුකුත් නොකාම වැඩට යන්නේ..

ඉස්සර ලයින් අක්කගේ හොර ලවු එක තියෙන කාලේ උනත් වාසි අපිටම තමයි.. අපරාදේ ඌ දැන් එන්නේ නැත්තේ.. ඒ දවස් වල ගනන් වැඩිම, රසම චොක්ලට් කන්න පුළුවන් උනේ ඒකට පිං සිද්ද වෙන්න.. ලයින් අක්කත් හැබැයි ලෝබ නෑ පොඩ්ඩක්වත්.. තඩි චොකෝ බාර් එකෙන් භාගෙකට වැඩිය දෙන්නෙ අපිට. අපිට කිවුවට ඉතින් මට.. ලයින් අක්කා ආයෙම හොර ලවු එකක් පටන් ගන්නවනම් ශෝක් අප්පා එක අතකට..

අනික අපේ ලොක්කා.. ලෝකේ වටේ කොහේ කොනක රිංගුවත් එද්දි අපිට කන්නන් මොනා හරි අරන් එනවම තමයි.. කන්න පුළුවන්ද බැරිද කියන එක වෙනම කතාවක්.. මේ ලගදි කොහේද ගියේ.. ආ.. ජර්මනියේ.. ජර්මනි ගිහින් ආපු වෙලේ මොකද්දෝ කේක් එකක් උස්සන් ආවා.. ලස්සනට තිබ්බා ඒක.. අර සූර පප්පලා ඊජිප්තු ගිය වෙලාවේ මකබාස් රැජිනට දෙන්න හදපු කේක් එක වගේ.. ලස්සනේ බෑ.. හැබැයි කන්න ගත්තම තමා එපා උනේ.. ඒක හදලා තිබ්බේ මම ජීවිතේට කාපු නැති පළතුරු ජාතියකින්.. ඒකේ මහ අප්සට් රහක් තිබ්බේ.. පොඩි කෑල්ලයි කෑවේ මුළු කේක් එකම එපා උනා.. අපරාදේ.. ලස්සන විතරක් කන්නය ඉතින්..

හරි අතුරු කතා ඇති.. දැන් එමුකෝ කියන්න හදපු කතාවට.. ලොක්කගේ අම්මා, දැන් සෑහෙන වයසයි.. මගේ හිතේ අවුරුදු 80 පැනලා.. හැමදාම අසනීපෙන්.. දැන් ටිකත් මෙමෙරි එකත් අවුල්.. හිටි ගමන් මගේ නමත් අමතක වෙලා අහනවා උඹ කවුද කියලා.. හෙහ්.. ඉතාලි කාරයෝ අස්සේ කල්ලෙක් මොකො කියලා දැකලා එක පාර බය වෙනවද මන්දා.. හෙහ්..  ඒවා කොහොම උනත් ලොක්කගේ අම්ම ගොඩක් හොදයි.. මේ ටිකේ මගේ අසනීපේ ගැන උනත් නිතර අහලා බලලා මාව බලාගන්න අමතක කරන්නේ නෑ.. ඒත් ඉතින් ඒවා එහෙම උනා කියලා මේ කතාව නොලියා කෝමද?

ලොක්කගේ අම්මට හොදට කෑම ජාති හදන්න පුළුවන්.. මොනා හැදුවත් රසයි.. වත්තේ තියෙන දොඩං ගස් වල දොඩං හැදෙන කාලෙට ඒවා අරන් දන්න සෙල්ලං ඔක්කොම දාලා එක එක කෑම හදනවා.. ආ.. මේ පාර දොඩං දාලා කෑම නෑ.. මේ පාර ගහට කුරුල්ලෝ වැහුවනේ...

මීට ටික කාලෙකට කලින් හවසක ෆාමසියට යද්දි ලැබ් එකේ තියෙනවා අම්මා හදලා ගෙනාව පුඩිමක්.. කිරියි තව මොනාදෝ මන්දයි දාලා හදන පුඩිම කලිනුත් ඕන තරම් කාලා තියෙන හන්දා ලැබ් එකේ පුඩිම සුදු පාටට බැබලි බැබලි තියෙද්දි ඔක කන්න ආපු ගමන්ම කාලා ඉන්නයි හිත.. ඒත් ඉතින් තනියම කන එක හරි නැති හන්දා කට්ටිය ඇවිත් වැඩ පටන් අරන් ටික වෙලාවක් යනකන් හිටියා..

" දිනේශ්  කන්න එන්නැද්ද?"

ලයින් අක්කගේ සුපුරුදු කට හඩ ඇහෙද්දි මාත් ගියා ලැබ් එක පැත්තට.. ඒ යන ඩිංගටත් පුඩිමේ භාගයක් ඉවරයි.. 

" මෙච්චර ඉක්මනට මේක ඉවරත් කාලාද?"

" උඹමනේ කියලා දුන්නේ අපිට යන තැනක ඉස්සෙල යන්න කියලා.."

මුංට ලංකාවේ කියමන් කියලා දුන්න එකේ අපරාදේ කියලා හිතුනා.. දැන් උං ඒවා මටම කියනවා.. මාත් මට ඇති වෙන ගාන බෙදාගෙන ලයින් අක්කත් එක්ක චැට් එක්ක දාගෙනම පුඩිමත් කලා දැම්මා.. කාලා ඉවර වෙලා පැයක් විතර යද්දි අරුන් ඔක්කොම ටොයිලට් එකට පොර කනවා.. කට්ටිට පෝලිමට යනවා එනවා..මාත් බැලූවා මොකො කියල..

" ඇයි මොකො අවුල?"

" දිනේශ්, උඹේ බඩ අප්සට් නැද්ද?"

" හ්ම්ම්.. නෑ.. ඇයි?"

" අනේ මන්දා බං.. අපිට නම් අප්සට්.. අර පුඩිමද මන්දා.."

" එහෙනම් ඉතින් මගෙත් අප්සට් වෙන්න එපැයි.. මේ මම ඉන්නේ හොදට.."

" උඹ ගැන අපි දන්නේ නෑ.. අපිට අප්සට්.. කො ඔතනින් අයින් වෙයන්.. මට යන්න ඕන.."

එදා කට්ටිය වැඩ වලට වඩා හිටියේ ටොයිලට් එකේ.. එකෙක් එළියට එනකන් ඉවසන් ඉන්න බැරුව අනිත් එකා ලොක්කගේ ගෙට දිවුවා හදිස්සිය වැඩි කමට. හැබැයි ඉතින් උන්ට එහෙම උනාට මට නම් කිසි අවුලක් තිබ්බේ නෑ.. වෙනදා සුපුරුදු ක්‍රියාවලිය ඇරෙන්න වෙන කිසිම අවුලක් ආවේ නෑ..

ඔය සිද්දිය වෙලා දැන් මාස තුන හතරක් වෙනවා.. ඊට පස්සෙත් එක එක කෑම ජාති ලොක්කගේ අම්ම හදලා ගෙනාවා.. ඒවා කොහොම කෑවත් ඊට පස්සේ අපේ සෙට් එක අර පුඩිම ගේද්දි ඒක කන එක මග ඇරියා.. මට ඉතින් අවුලක් උනේ නෑනේ.. මම කෑවා.. :)

මේ ගෙවුන සිකුරාදා ලොක්කගේ අම්මා ආයෙම මේ පුඩිම හදලා ගෙනත් තිබ්බා.. දැක්ක ගමන් මට පුඩිමේ අතිත කතාව මතක් උනා.. සිකුරාදා මම යද්දි ටිකක් පරක්කු උනා.. යද්දි අර පැනලා ගිහින් ආව එක්කෙනා එන්නවා ලැබ් එකේ.. 

" දිනේශ් පුඩිං කනවනේ?"

" ආ ඔව්.. ඕක කන්නේ මම විතරනේ.. ඔහොම තියන්න මමම බෙදා ගන්නම්.."

" ඇයි අනිත් අය කන්නේ නැද්ද?"

මම ඉතින් වෙච්ච ස්ටොරි එක කෙටියෙන් කියලා දැම්මා.. කියලා ඉවර වෙලා නොකන අයගේ නම් ටික කිවුවා ගිහින් අහන්න කන්න බෑ කියන්නේ නැද්ද කියලා.. ෆාමසියට අළුතින් ආව ඩොකා කලින් කේස් එක වෙද්දි හිටියේ නෑ.. ඒ හන්දා ඒකා කන බව ශුවර්.. අහ්, ලයින් අක්කත් මං වගේ තමයි.. එයාට කොකත් එකයි.. කිවුව වගේම අනිත් උන් පුඩිං කියන නම ඇහෙද්දිම ඒකට කොච්චර කැමතිද කියලා කිවුවා.. මුකුත් නොදන්න අළුත් ඩොකා ඇවිත් කාලා දැම්මා.. ලයින් අක්ක එක්ක ඇවිත් මාත් කෑවා..

" මේ මේක මොනා දාලාද හදන්නේ?"

මම අන්තිම ටික කකා ඉද්දි අර කෙල්ලගෙන් ඇහුවා..

" කිරි විතරයි.. ඔයා දන්නේ නෑ.. සමහර දාට මෙයා කල් පැන්න කිරි එක අහු උනාම ඒක දාලා හදන්නේ.."

අන්තිමට කන්න ගත්ත එක මට කාගන්න බැරි උනා වගේ දැනුනා ඒ අහපු කතාවට.. කලින් වතාවේ මම හිතුවේ අරුන්ට වෙන අවුලක් නිසා එහෙම උනා කියලා.. බලද්දි පුඩිමේ අවුල තමයි..

" අපි කිවුවට අහන්නේ නෑ දිනේශ්.. දන්නවනේ එයාගේ මීටරේ.."

" ඔව් ඔව් ඇත්ත.."

ඒ කතාව ඇහුනේ හොද වෙලාවට කියලා හිතුනා.. සිකුරාදත් හැබැයි කෑවට මට නම් අවුලක් උනේ නෑ.. යහතින් ඉන්නවා.. හැබැයි ආයෙනම් එකක් හිතා ගත්තා.. මෙයා මේ පුඩිම හදලා ගෙනත් කන්න කිවුවොත් දෙන්නේ එක උත්තරයයි..

" NO GRAZIE "