කලිසම - පූස්පාර්ට් යාළුවෝ 2

අළුත් කියලා දැක්ක රේඩියෝව ගන්න ගිහින් කුණු බක්කියේ කකුල් උඩ දාන් වැටිලා හිටියට පස්සේ සිල්වා කතා බහ කර කර හිටපු අය අතරේ තවත් විහිළුවට ලක් වෙන කෙනෙක් උනා.. සිල්වා ඉන්න තැනදි නෙමෙයි නැති වෙලාවට.. ආරංචි පතුරන අය ඒවට මගදි තව තව ඒවා එකතු කරන හන්දා මේ සීන් එක දවසින් දවස පැතිරුනේ තව තව ඒවා එකතු වෙලා.. අන්තිමේ කතාව නතර උනේ සිල්වා බීලා කුණු බක්කියේ හිටියා කියලා එහෙම නෙමෙයිලු හොදේ.. 

කොහොම හරි මේ සිද්දියත් එක්ක සිල්වයි කමලුයි තවත් හිත් අමනාපකම් ඇති කර ගත්තා.. එකම තට්ටු නිවාසේ උඩ ගෙදරයි යට ගෙදරයි හිටියා උනාට මඟදි කතා කලොත් ඇරෙන්න කිසි කතාවක් තිබුනේ නෑ..  සිල්වගේ හිතේ  වැඩි තරක් තිබ්බේ කමල්ගේ වයිෆ් එක්ක.. ඒ වෙන මොකක් වත් නිසා නෙමෙයි මෙහේ මොනා උනත් හැරෙන තැපෑලේ ලංකාවට කතා කරලා ආරංචිය දෙන නිසා..

" ඒ ‍xxx ගැණි එක්ක බෑ.. ඒකයි මම ගෙදර නම්බර් එකත් මාරු කලේ.."

ගෙදරට ආරංචි යන එක නවත්තන්න බැරුව අන්තිමට සිල්වා කලේ ගෙදර නම්බර් එක මාරු කල එක.. අදටත් කවුරුවත් ගෙදර නම්බර් එක දන්නේ නෑ.. සිල්වා ලංකාවට ගිය වෙලාවට අපිට හදිස්සියෙන් හරි කතා කලොත් කතා කරන්නේ නම්බර් එක බ්ලොක් කරලා.. No Number වැටෙන්න.. ඒ තරමට බයයි, ඒ හන්දම පරිස්සම්..

සිල්වගෙයි කමල්ගේ වයිෆ්ගෙයි අතර අමනාපකම් ඇති වෙන්නේ මීට අවුරුදු ගානකට කලින් උන එක සිද්දියක් නිසා.. ටික කාලෙකට කලින් සිල්වගේ කොන්දේ අමාරුවක්  හැදිලා ලංකාවට ගියා බෙහෙත් කරන්න.. ලංකාවට ගිහින් පහුවදා දවල් වෙද්දි කමල්ගේ වයිෆ් සිල්වගේ ගෙදරට කතා කරලා සුවදුක් අහලා ඕප දුප කතා කලේ ඉතින් ගෑණු දෙන්නගේ තිබ්බ හිතවත් කම නිසා..

" සිල්වට කොන්දේ අමාරු නිසා මේ පාර ආවට මුකුත් වැඩත් නැතුව ඇති නේ?"

" අයියෝ මොන පිස්සුද? ආව දවසෙම රෑ ඇදට ගිය ගමන් එක පාරක් ඉදලා ආයෙම පාන්දර ජාමෙත් මාව ඇහැරවා ගත්තා.. "

ඔය කතාව මුළු කතානියා වලම සිල්වා එන්නත් කලින් කොහොම පැතිරුනාද කියලා ඉතින් අමුතුවෙන් කියන්න ඕන නෑ.. අදටත් සිල්වට මොකක් හරි අසනීපයක් කිවුව ගමන් අපි ඕකට එකම බෙහෙත තියෙන්නේ ලංකාවෙනේ අංකල් කියන්න දෙපාරක් හිතන්නේ නෑ.. ඒ වෙලාවට ඉතින් අපිට කුණුහරප අහන්න වෙන්නෙත් නෑ.. :)

කොහොම උනත් කමල්ගේ වයිෆ්ව බයිට් එකට ගන්න හිත හිත හිටිය සිල්වට ඒකට පොයින්ට් එකක් අල්ල ගන්නනම් ටිකක් අමාරු උනා.. මොකද කමල්ගේ වයිෆ් කියන්නේ ලේසි පහසු ගෑණු පරාණයක් නෙමෙයි.. 

මේ සිද්දිය වෙන්නේ එක්තරා සිත සමයේ දවසක.. සිත කාලෙට අදින්න වෙන ඇදුම් ගාන වැඩියි.. ඒක ඉතින් දන්නෝ දනිති.. මේ එක්තරා සිත සමයේ දවසක උදේ කමල්ගේ වයිෆ් ඇහැරෙන්නෙ එලාම් එක තිබ්බ වෙලාව පහුවෙලා.. මගේ හිතේ රෑ වැඩ තියෙන්න ඇති..

පුළුවන් තරම් ඉක්ම්නට නැගිටලා දත කට මැදන් මූණ හොදන් ඇදගෙන හරි පරක්කු උන නිසා දත කට නොමැද මුණ නොසෝදා හරි කලබලේ ඇදගත්ත කමල්ගේ වයිෆ් ඉක්මනට එලියට බැහැලා ආවෙ වැඩට යන්න තියෙන බස් එක අල්ල ගන්න.. 

මග දිගට ආව හම්බුන අය තමන් දිහා අමුතු විදිහට බැලුවා කියන එකවත් වෙනදා කපටි මොලෙන් හිතන්නේ නැතුව බස් එකට දිවුවේ පරක්කු උන නිසා.. කට්ටිය ඉන්න තට්ටු නිවාසේ ඉදන් බස් ස්ටෑන්ඩ් එකට වැඩි දුරක් නෑ.. ඒත් මේ කතානියා සෙන්ට්‍රල් එක.. ඒ කියන්නේ ඉතින් සෙනග වැඩි.. කවුරුවත් බල බල ඉන්න එක නොහිතා හැමදාම යන බස් එකට නැග්ගට පරක්කු උන නිසා සිට් නෑ.. හිට ගෙන ඉද්දි බස් එකේ කට්ටිය තමන් දිහත් අමුතු විදිහට බලන බව ටිකක් මීටර් වෙලා.. ඇදුමෙවත් මොකක් හරි අවුලක්ද කියලා බලද්දිම ලග හිටිය ඉතාලි කාරයෙක්,

" signora hai dimenticato i tuoi pantaloni "

කියලා කිවුවේ නෑලු.. ඔක්කොම ඇදලා හැඩ වැඩ වෙලා එලියට බැස්සට කලිසම ඇදලා නෑනේ කියලා මතක් උනාම බස් එකේ යකඩ පලාගෙන යන තරම් ලැජ්ජාවක් මුණෙ තිබ්බා කියලා කිවිවේ ඒ බස් එකේම පිටි පස්සේ සීට් එකක වාඩි වෙලා සීන් එක දැකලා හිනා වෙවි හිටිය අපේ අයියගේ යාළුවෙක්..

ලැජ්ජාව සාක්කුවේ දාගෙන ටක් ගාලා බස් එකෙන් බැහැලා ගෙදර දුවද්දි සිල්වලත් වැඩට යන්න ලෑස්ති වෙලා එලියට එන ගමන්.. උදේ පාන්දර දැකපු ප්‍රිය දසුනින් කවුද ප්‍රබෝදමත් නොවෙන්නේ ඉතින්.. :)

වෙලා තියෙන්නේ මෙන්න මේකයි.. සීත කාලෙනේ.. අනිත් කාලෙට වගේ නිකන් කලිසම ඇදලා උඩට විතරක් ජැකට් සිතල නොවදින්න ජැකට් ඇන්දා කියලා වැඩක් නෑ.. ඒ හන්දා ඩෙනිම් කලිසම අදින්න කලින් හීතල දරා ගන්න පුළුවන් විදිහේ ලානා වලින් මහන කලිසමක් අදිනවා.. මේක නිකන් පිජාමා එකක් වගේ තමයි.. මෙයන් කලබලේට අන්න ඒ ලානා කලිසම ඇදලා උඩට පුරුදු විදිහටම ඇදලා සපත්තු කාරිය දාලා ගෙදරින් එලියට බැහැලා.. 

අනුන්ගේ කූණු කන්දල් අවුස්සලා ඕප දුප හොය හොය හිටි කෙනාට ඊට පස්සේ මොනා වෙන්න ඇත්ද කියලා ඉතින් කියන්න ඕන නෑනේ.. ඒත් ලංකාවේ අයගේ සති 2 තියරියට අනුව ඉක්මනටම කට්ටියට මේවා අමතකයි.. අපිට එහෙමත් අමතක වෙනවද ඉතින්.. ඒකනේ අවුරුදු ගානකට පස්සේ මේ ලියලා දැම්මේ..

තව පුස්පාර්ට් කතාවකින් හමුවෙමු.. එතකන් Ciao...