ප්‍රධාන ශිෂ්‍ය නායක ( ඉස්කෝලේ කතා 11 )

හොදම හතුරා ආවට පස්සේ ඉස්කෝලේ ජීවිතේ ටිකක් විතර වෙනස් වුනා..  තරහා කාරයෙක් එක්ක එකට ඉන්නවා කියන එකත් ලේසි නෑනේ..  ඒත් ඒක කරන්න වුනා.. ප්‍රශ්ණ ඇති වෙච්ච මුල්ම දවස් වල කතා බහ දුර දිග ගිහින් අතින් පයින් ප්‍රශ්ණ විසඳන තැනටම ආවා.. දවසක් පිට්ටනියේ රණ්ඩුවක් වෙලා සුදු ඇදුම දුඹුරු පාට කරන් ගෙදර ගියා මතකයි..

ඒ දේවල් කොහොම වුනත් කපුකම කරන්න ගිය නංගිනම් මාත් එක්ක ගොඩක් ෆිට් උනා.. ඉස්සරටත් වැඩිය.. හා හා.. දැන් ඉතින් මෙයාලා හිතනවා මම ලයින් දැම්මා කියලා.. ඇත්තටම එහෙම දෙයක් වුනේ නෑ.. කාගෙවත් ලයින් එකක් හරි කවුරුහරි යාළු වෙලා ඉන්න කෙනෙක්ව හරි ඈත් කරලා ඒ කෙනාව ලබා ගන්න එක මහ පවු වැඩක්.. ඉතින් මගේ හිතේ එහෙම දෙයක් තිබුනේ නෑ.. දන්නවා දැන් කට්ටිය හිතනවා මම බොරු කියනවා කියලා.. කපුටත් හිතුවේ එහෙමම තමයි..

ටිකින් ටික අපේ සීතල යුද්දෙත් නැගලා ගියා.. මට නම් අවුලක් තිබ්බේ නෑ.. ඒත් ඉතින් සීනියර් ප්‍රිෆෙක්ට් හන්දා ටිකක් පරිස්සම් වෙන්න උනා.. දෙතුන් වතාවක් අවවාදත් ලැබුනා...  :)

" අසන්ත තමුසෙලාගෙ ප්‍රශ්ණේ විසද ගන්නවා..."

" එහෙම ප්‍රශ්ණයක් නෑ.."

" නැති වෙන්නේ කොහොමද? උඹල කෙල්ලෙක්ට ගහ ගන්නේ ලැජ්ජ නැද්ද.. එක පන්තියේ උන් නේ?"

" කපුටයි වැරදියට හිතන් ඉන්නේ.. මට ඒකට කරන්න දෙයක් නෑ.."

අපිට එකවුන්ට් උගන්නපු සර් අපි රණ්ඩු වුන හැම වෙලාවකම මේ වචන සෙට් එකම කියලා කෑ ගහලා  තියෙනවා.. ඒත් කපුටවත් මමවත් ප්‍රශ්ණේ විසදගන්න ඉස්සර වෙන්න කැමති වුනේ නෑ.. මම කොහොමත්ම නෑ.. මොකද මම වරදක් කලේ නැති නිසා..

ඔය කාලේ වෙද්දි මම ඉස්කෝලේ DHP.. භාහිර වැඩ වලට හැම තිස්සෙම පන්තියෙන් එලියේ හිටියේ.. අහ්, මගේ අර ජනේලේ ලඟ තැන කපුටට ගහලා ආයෙම මම අර ගත්තා.. ඒත් ඉතින් ඔතන වාඩි වෙලා ඉන්න පන්තියේ හිටියේ නම් හරි අඩුවෙන්..

2005 අවුරුද්දේ දෙවෙනි වාරේ පටන් ගනිද්දි අපේ ඉස්කෝලේ හිටපු HP අස් වෙලා ගියා.. අවංකවම කියනවනම් මගේ සීනියර් කෙනෙක් විදිහට මම ගොඩක් ගරු කලා ඒ අයියට.. ඒ වගේම HP හිටිය අක්කත්.. දැන් වගේ නෙමෙයි.. ඉස්සර මට ගොඩක් කේන්ති යනවා..  එහෙම කේන්ති යන ගොඩක් වෙලාවට මේ දෙන්න බනිද්දි මම ටිකක් කන්ට්‍රෝල් වෙනවා.. මම දැක්ක හොදම HP ලා මේ දෙන්න කියන්න මම දෙපාරක් හිතන්නේ නෑ..

ඒ දෙන්නා ගියාට පස්සේ ඒ හිස් තැන පුරවන්න තිබුනේ ඊලගට හිටිය සීනියර්ලා වුන අපිට.. අපේ පන්තියෙම කෙල්ලෙක් ගෑල්ලමයින්ට HP වෙද්දි ගුරුවරුන්ගේ ඡන්දෙයෙන් මම ඉස්කෝලේ HP උනා.. ඉස්කෝලේ ජීවිතේ ලබන්න පුළුවන් ලොකුම ගෞරවය එහෙම ලැබෙද්දි හිත ගොඩක් සතුටු උනා.. හැබැයි ඉතින් මාත් එක්ක පොඩි ප්‍රශ්ණ වගයක් තිබුන ගුරුවරු දෙතුන් දෙනෙක් මට අකමැති වුනේ නැත්තෙමත් නෑ.. ඒ කොම වුනත් ඒ අයත් පස්සේ මාත් එක්ක තිබ්බ අමනාපකම් අමතක කලා..

මිශ්‍ර පාසලක HP වුනාම ඉතින් කොච්චර තැනක් එනවද කියලා අමුතුවෙන් කියන්න ඕන නෑනේ ඉතින්.. ඔව් ඔව්.. ගෑල්ලමයින්ගෙන් තමයි මම කිවුවේ.. ඉස්සර උදේට කී දෙනෙක්ගේ "ගුඩ් මෝර්නින්ග්" වලට "ගුඩ් මෝර්නින්ග් නංගී" කියලා කියන්න ඇත්ද.. හෆ්ෆේ.. ආයෙම ඒ කාලේ එනවනම්...   අහ් කතාව නේ... :)

හැමෝම මාත් එක්ක හිටියත් මේ සිද්දියත් එක්ක කපුටා තවත් මාත් එක්ක වෛර බැද ගන්න ගත්තා.. ඒකා කියන විදිහ HP වෙන්න එකම සුදුස්සා ඒකලු.. සුදුසුකම වයසින් වැඩි වීමලු.. හෙහ්.. අපි කපුටට කිවුවද වෙන ඉස්කෝලෙක අවුරුද්දක් ඉදලා ආයෙම ඒ පන්තියටම කලින් හිටිය ඉස්කෝලෙට එන්න කියලා.. හරියට බලනවනම් කපුටට ශිෂ්‍ය නායක කමත් දෙන්න බෑ.. හරි ඒ දේවල් එහෙම ගියා දෙන්කෝ.. කපුටට ඕන එකක් හිතා ගන්න කියලා මම මගේ පාඩුවේ හිටියා.. ඊට පස්සෙනම් ඇත්තටම රණ්ඩුවට පැටලෙන්න ගියේ නෑ.. මොකද මටත් වගකීමක් තිබුන නිසා.. කෝම උනත් කපුටා මාව විවේචනේ කරන එකනම් නැවැත්තුවේ නෑ.. ඒ හැම එකකටම මාත් උත්තර දුන්නා.. අතින් පයින් නෙමෙයි.. හොදට හිතලා..

ගොඩක් වෙලාවට කරපු වැඩ වලදි මම පවරපු වැඩේම මග ඇරලා ඒකේ වගකීම කපුටා දෙතුන් වතාවක්ම මගේ ඇගට දැම්මා.. ඔච්චරම නයි වෛරයක් හිතේ තියා ගනී කියලා හිතුවේ නෑනේ.. දුර ඉන්න යාළුවට වැඩිය ලග ඉන්න හතුරා හොදයි කියලා කවුරු හරි කියලා තියෙනවා වගේ යාන්තමට මතකයි.. ඒ හන්දා කලින් ඈත් කරලා හිටිය එකාව අකමැත්තෙන් වුනත් මගේ පේනමානෙන් කපුටව තියා ගන්නත් වුනා.. ඒ තරම් එපා කරපු දෙයක් මට මතක ඇති කාලෙක තිබුනේ නෑ.. ඒත් අකමැත්තෙන් වුනත් කරන්න වුනා..

අපේ කලින් හිටිය HP අස් වෙලා යන්න කලින් දවසක් පෞද්ගලිකව මට ඉස්කෝලේ කවුරුත් නොදන්න දෙයක් ගැන පුංචි හෝඩුවාවක් දිලා ගියා.. ඒ හෝඩුවාව පස්සේ ගිහින් ඒ කාරණේ ඇත්තක් කියලා හොයාගත්ත හැටි ඊළග ඉස්කෝලේ කතා එකෙන්... :)